Gilo Batu Akik

(Sebuah Cerpen)

Oleh: Suharyanto

Iko cerito kawan ambo yang hobi batu akik. Kawan ko memang kolektor batu akik. Nyo kalu cerito batu akik cak tahu galo dari A sampai Z. Akik dari Sabang sampai Merauke tahu galo. Cuma ambo ko ado lah kesalnyo ke nyo ko. Bukan kesal dengan batu akiknyo. Tapi rengam dekek caro nyo yang suko becerito tentang batu akik. Mulai dari asal muasal batu akik, warno, motif, ukuran, hargo dan khasiatnyo, segalo diceritokan. Ceritonyo kadang diulang-ulang terus, caknyo orang baru sekali kolah dengar ceritonyo. Kalu nyo lah becerito batu akik dak biso lagi disela, dak biso lagi kito menimpali, pokoknyo sampai nyo abis becerito. Ciri-cirinyo kalu mulutnyo lah bebuih. Itu biso berjam-jam. Minimal 1 jam dak berenti. Sapo yang ndak ndengarinyo.

Makonyo kawan-kawan kami ngecek, kalu ado nyo jangan sekali-kali nyenggol masalah akik, kelak kito tejebak kek ceritoannyo. Nanggung kito dak biso berenti, ndak begeser duduk bae dak biso. Kesal lagi kalu nyo becerito kadang sambil bisik-bisik ke telingo, seolah-olah itu cerito bernilai tinggi dan cuman ambo sorang yang dikasih tahu. Padahal ambo tahu, hal serupo nyo ceritokan jugo ke kawan yang lain. Pokoknyo mengesalkanlah. Perangai iko mungkin lah bawaan orok.

Pernah suatu ketiko ambo sedang ngetik mbuek tugas di kosan. Ambo berdoa semalaman supayo kawan ambo ko idak datang ke kosan. Kalu lah datang pastilah ambo dak biso kerjo tugas. Tapi baru ajo mbuka laptop kiro-kiro ngetik dapek separagraf. Ado yang ngetuk pintu kosan, “assalamu alaikum”, suaro orang yang ambo pastikan kawan ambo itu. “Ash.. sudah…!” batin ambo sambil menuju pintu mbukakan pintu “wa alaikum salam”.

“Apo kerjo, ndan”, tanyok kawan ko.

“Mbuek tugas. Masuklah”, kecek ambo agak ketus, sambil membatin “Aih, ngapo lah lanang ko datang. Lokak dak biso kerjo ambo ko”.

Buru-buru ambo kecek, “sorry yo ndan, ambo ngetik tugas. Soalnyo bisuk ndak dikumpul”. Padahal masih tigo hari lagi.

“Lajulah. Ambo numpang golek-golek ajo”, keceknyo. Ambo tengok nyo golek-golek di kasur dipan ambo sambil memeluk guling. Entahlah apo yang dipikirkannyo dengan meluk guling tu. Yang penting ambo ngetik tugas.

Ambo sengajo pasang sikap yang kurang bersahabat dengan harapan kawan ko idak betah di kosan ambo. Kelak payah ambo dak biso kerjo kalu lah tejebak nyo becerito batu akik.

Memang apes ambo ko. Ambo keceplosan tanyo giok Aceh yang ditemukan berton-ton oleh seseorang dan belum biso diangkat.

Kontan nyo tebangun tegak di pinggir dipan ke arah ambo ngetik, “itulah yang ndak ambo ceritokan kek kau tu”. Aih, nyesal ambo tanyo tadi. Samo bae ambo menyulut api di bensin. Siap-siaplah ambo tebakar. Ambo langsung buang muko ke arah laptop melaju ngetik. Walaupun dak do ide untuk diketik, icak-icaknyo ambo ngetik. Jangan sampai nyo nerocos cerito batu akik.

Dasar lah tabiat bawaan orok, nyo cerito kencang tentang batu giok aceh itu. Aduh. Ambo nyesal nian. Abis cerito giok Aceh, nyo cerito lagi akik kalimaya. Keceknyo, kalu kito pakai kalimaya, kito mudah dapek tino. Segalo tino yang kito ndak, lengket ke kito. Nyo cerito jugo kecubung wulung. Kecubung wulung, keceknyo, bisa untuk menangkal racun. Jadi kalu kito pai-pai ke tempek yang masih pedalaman, pakailah kecubung. Aman kito dari racun orang dusun. Nyo jugo menjelaskan keindahan batu akik dari motifnyo, warnonya, refraksi cahaya dan segalo macam lah. Ambo jugo dak denger nian. Ambo masih jugo ngetik icak-icak. Keceknyo, kini ko yang lagi mahal batu Bacan. Bacan Doko dari Ternate. Yang makai Bacan ko orang-orang hebat, para sultan, pejabat negara, artis luar negeri dan macam-macam.

Sekelebat nyo ndekeki ambo, membisik, “Eh, tahu dak. Ado batu hijau garut. Batunyo hijau cak lumut bisa untuk pengasihan. Jadi kalu kito pegang batu itu, segalo orang nengok kito dengan penuh kasih. Biso jugo untuk nggaet mete”. Ambo kesal nian. Telingo memerah, muko padam, dado naik turun menahan emosi.

“Diaamm..!”, segak ambo “Biso diam dak. Ambo ngerjokan tugas!”, ambo bentak sambil gebrak meja. Baru ikolah ambo marah sedahsyat iko. Dado ambo naik turun nahan emosi. Perlahan ambo tarik napas untuk tenang. Ambo tengok kawan ko tenganga, mato sayu, jari gemetar, lutut meretek, dak biso lagi becerito.

Ikolah, ambo pikir, ambo mengukir sejarah. Ambo mampu menghentikan tabiat bawaan orok kawan ko. Dengan nyegak sekali, kawan langsung berenti ngoceh. Kawan-kawan ambo kalu tahu pasti riang dan ambo dijuluki pahlawan yang mampu menghentikan celoteh batu akik. Soalnyo segalo orang kesal jugo dengan dio yang suko becerito batu akik.

Tibo-tibo nyo tambah mretek kakinyo, lalu teduduk, tangan menyentuh lantai, kepalo tetunduk. Ambo tengok, ibo ati ko. Nyo cak pahlawan yang kalah perang. Lah pasrah di tangan musuh, idak berani ndongakkan kepalo. Nyo lah takluk, kalah. Ambo riang bukan kepalang. Ikolah ambo, yang telah menyelamatkan kawan dari kejengkelan kawan dalam sekejap. Ambo yakin setelah ko dak kan lagi nyo berani becerito tentang batu akik lagi. Ambo yakin kalupun nyo becerito pasti seperlunyo bae.

Ambo bangun dari kursi seraso pahlawan berjiwa besar. Ambo raih pundak kawan ko. Ambo tepuk-tepuk dan kepalonyo ambo usap.

“Maafkan ambo, ndan. Bukan maksud ambo mbuek kau tediam cak iko. Ambo tadi emosi kerno lagi ngetik tugas”, ambo kecek pelan dengan hati bak jagoan yang menang.

“Tegaklah, duduk lagi, atau golek-goleklah lagi. Ambo buekkan teh manis”, rayu ambo. Nyo masih tediam. Tangannyo teraso dingin, wajahnyo pucat pasi. Ambo bantu tegak terus nyo bebaring di kasur dipan ambo. Ambo mbuek teh panas duo gelas. Untuk nyo kek ambo.

“Nah, minumlah ko dulu. Biar hangat badan. Sekali lagi ambo minta maaf”, dalam hati ambo cak ikolah caro menghentikan tabiat orang ko. Ambo riang, senang, menang.

Ambo terus ngetik tugas lagi tapi kini dengan perasaan tenang. Idak lagi kawatir diganggu. Ambo biso baco-baco artikel dengan khusuk. Dak mungkin lagi kawan ko becerito tentang batu akik. Sekali ambo lirik kawan ko, nyo tegak dan minum teh yang ambo buek. Caknyo lah mulai tenang nyo dak lagi mengkhawatirkan lagi. Dak mungkin lagi nyo berani becerito akik lagi.

Ambo masih di depan laptop dengan tenang. Jari tangan ambo begerak-gerak memukul huruf-demi huruf di keyboard dengan lancar. Ketikan terhenti ketiko kawan ko menepuk bahu ambo. Ati ambo ngecek, “nyo ndak pamit balik. Padeklah”. Tambah senanglah ati ambo, kelak nyo balik dengan membawa kondisi jiwa yang sudah suci lagi. Idak dikotori cerito-cerito batu akik sehinggo kawan banyak yang ndak bekawan kek nyo lagi.

“Hei, tahu dak kau. Kini batu cempaka madu Bengkulu ko lah dikasih namo red rafflesia. Mungkin iko untuk menaikkan pamor batu kito. Memang setelah dinamoi red rafflesia nilai jualnyo tinggi dan namo Bengkulu jadi terangkek”, ceritonyo.

Ambo tediam. Bengong, kacau. Masih jugo tabiat bawaan orok kawan ko.[]

 

Bogor, 6 Maret 2015

4 Comments

Filed under Cerita

4 responses to “Gilo Batu Akik

  1. semua kalangan suka termasuk kalangan wanita juga

  2. memang sedang trend dan harganya bervarian sekali

  3. keren infonya dan bermanfaat sekali

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s